रामचंद्र साबळे हवामान अंदाज ; या आठवड्यात हवामान कसे राहील ; महाराष्ट्राच्या उत्तरेकडील भागावर आजपासून मंगळवारपर्यंत (७ ते ९) १०१४ ते १०१६ हेक्टोपास्कल इतका अधिक हवेचा दाब राहील, तर मध्य व दक्षिण महाराष्ट्रावर १०१२ हेक्टोपास्कल इतका अधिक हवेचा दाब राहील. जेव्हा किमान व कमाल तापमानात घट होते, तेव्हा हवेचे दाब वाढतात. या तीन दिवसांत महाराष्ट्राच्या उत्तरेकडील भागात थंडीचा कडाका अधिक जाणवेल.
🌡️ वाऱ्याची दिशा आणि तापमानावरील परिणाम
बुधवारपासून शनिवारपर्यंत (१० ते १३) हवेच्या दाबात फरक होईल. महाराष्ट्राच्या उत्तरेकडील भागात थंडीचे प्रमाण थोडे कमी होईल. त्याचप्रमाणे मध्य व दक्षिण महाराष्ट्रातही थंडीचे प्रमाण कमी होईल. ज्या वेळी वाऱ्याची दिशा बदलते तेव्हा हा फरक होतो. उत्तरेकडून आणि ईशान्य दिशेने येणारे वारे अतिथंड असतात, तर पूर्वेकडून व आग्नेयेकडून येणारे वारे अतिथंड नसतात. त्यामुळे त्याचा थंडीच्या प्रमाणावर परिणाम होत असल्याचे दिसून येते.
